குழந்தைகள் முதல் பெரியவர்கள் வரை விரும்பி சாப்பிடும் ஒரு கிழங்கு உருளைக்கிழங்கு. இந்த உருளைக்கிழங்கை வைத்து பலவகையான உணவு பதார்த்தங்களை தயார் செய்யலாம். அதில் மிக எளிதாக இந்த உருளைக்கிழங்கு வறுவல் செய்யலாம். இந்த வறுவல் தயிர் சாதம், ரசம் சாதம், சாம்பார் சாதம் போன்றவற்றுக்கு ஏற்ற ஒன்று.
தேவையான பொருட்கள்
உருளைக்கிழங்கு - 2
மஞ்சள் - 1/8 டீஸ்பூன்
மிளகாய்த்தூள் - 1/2டீஸ்பூன்
உப்பு - தேவையான அளவு
தேங்காய் எண்ணெய் - 2 டேபிள்ஸ்பூன்
செய்முறை
உருளைக்கிழங்கை கழுவி தோலை கத்தி வைத்து சுரண்டி நீக்கவும். தோல் முழுவதும் நீக்காமல் ஒன்றிரண்டு இடங்களில் ஒட்டிக் கொண்டிருந்தால் நல்லது.
உருளைக்கிழங்கை சிறு சிறு துண்டுகளாக நறுக்கிக்கொள்ளவும். ஓர் இரும்பு கடாயை ( தோசைக்கல் மாதிரி அகன்றதாக இருக்கவேண்டும். ) அடுப்பில் வைத்து சூடானதும் எண்ணெய் விடவும்.
எண்ணெய் சூடானதும் நறுக்கிய உருளைக்கிழங்கு துண்டுகளைச் சேர்த்து கிளறவும். அதனுடன் மஞ்சள் மற்றும் உப்பு சேர்த்து கிளறவும். 2 நிமிடங்களுக்கு ஒரு முறை கிளறிவிடவும். அப்போது தான் கடாயில் ஒட்டாமல் இருக்கும். லேசான தீயிலேயே வைத்து வேகவைக்கவும்.
உருளைக்கிழங்கு முக்கால் பதம் வெந்ததும் அதில் மிளகாய்தூள் சேர்த்து கிளறவும். 2 நிமிடங்களுக்கு ஒரு முறை கிளறி விடவும். உருளைக்கிழங்கு வெந்ததும் தீயை அதிகமாக வைத்து கைவிடாமல் கிளறவும். உருளைக்கிழங்கு துண்டுகள் பொரிந்து வரும்போது அடுப்பை அணைக்கவும். இரும்புக் கடாயிலிருந்து வேறு பாத்திரத்திற்கு மாற்றி சூடாக பரிமாறவும்.
