பெண் குழந்தைகள் பூப்பெய்தும் போது அவர்கள் இடுப்பெலும்பு வலுப்பெறவும், கர்ப்பப்பை வலுப்பெறவும் உளுந்து மிக உதவியாக இருப்பதால் உளுந்து களி, உளுந்து லட்டு போன்றவற்றை அவர்களுக்கு அளிப்பது வழக்கம். இந்த உளுந்து லட்டு குழந்தைகள் முதல் பெரியவர்கள் வரை விரும்பி சாப்பிடும் ஒரு இனிப்பு வகை. குழந்தைகள் முதல் பெரியவர்கள் வரை அடிக்கடி இந்த லட்டு சாப்பிட்டு வரும் போது எலும்பு வலுப்பெறும்.
தேவையான பொருட்கள்
உளுந்து - 1 கப்
பச்சரிசி - 2 டேபிள் ஸ்பூன்
பொட்டுக்கடலை - 2 டேபிள் ஸ்பூன்
பொடித்த நாட்டுசர்க்கரை - 1/2 கப்
நல்லண்ணெய் அல்லது நெய் - 1/2 கப்
செய்முறை
ஒரு இரும்பு கடாயை சூடாக்கி அதில் உளுந்தை வறுக்கவும். எண்ணெய் எதுவும் சேர்க்க தேவையில்லை. உளுந்து நன்றாக வறுபட்டு வரும் போது நல்ல மணம் வரும். உளுந்து வறுபட்டு விட்டதா என்பதை அறிய ஒரு உளுந்தை எடுத்து சூடு ஆற வைத்து வாயில் போட்டு மென்று பார்க்கும் போது எளிதாக மென்று சாப்பிட வந்தால் உளுந்து வறுபட்டு விட்டது என்று அர்த்தம். உளுந்து வறுபட்டபின் அதை ஒரு தட்டில் மாற்றி ஆற வைக்கவும்.
அதன்பின் அதே கடாயில் பச்சரிசியை அதன் நிறம் மாறும் வரை வறுக்கவும்.வறுபட்டபின் அதை ஒரு தட்டில் மாற்றி ஆற வைக்கவும்.
அதன்பின் அதே கடாயில் பொட்டுக்கடலையை 1 நிமிடம் வறுக்கவும்.வறுபட்டபின் அதை ஒரு தட்டில் மாற்றி ஆற வைக்கவும்.
இவை மூன்றும் ஆறியபின் மிக்ஸியில் சேர்த்து நன்கு அரைத்துக்கொள்ளவும். பின் அதனுடன் பொடித்த நாட்டுசர்க்கரை சேர்த்து அரைத்து ஒரு பாத்திரத்திற்கு மாற்றிக்கொள்ளவும்.
ஒரு கடாயில் நல்லண்ணெய் அல்லது நெய் சேர்த்து சூடாக்கி அதை உளுந்து மாவில் சேர்த்து லட்டுகளாக உருண்டை பிடிக்கவும். லட்டுகளை ஒரு காற்றுப்புகாத டப்பாவில் போட்டு வைத்தால் 5 நாட்கள் வரை கெடாமல் இருக்கும்.
