கோவைக்காய், கொடியில் காய்க்கும் ஒரு காய் வகை. பார்ப்பதற்கு சிறிய வெள்ளரிக்காய் போன்று இருப்பதோடு மட்டுமல்லாமல் சமைக்காமல் பச்சை காயாக சாப்பிடும் போது வெள்ளரிக்காயின் சுவையிலேயே இருக்கும். கிராமங்களில் வேலிகளில் கோவைக்காய் கொடிகள் படர்ந்திருப்பதைப் பார்க்கலாம். கோவைக்காய் நன்கு முற்றுவதற்கு முன்பே கொடியிலிருந்து பறித்துவிடவேண்டும். முற்றிய காய்கள் சிறிது புளிப்பாக இருக்கும். கோவைக்காய் எளிதில் வளர்க்கக் கூடிய ஒரு கொடிவகை. கோவைக்காய் செடியிலிருந்து ஒரு கம்பு எடுத்து நட்டு வைத்தாலே வளர்ந்து விடும். எல்லா சீசனிலும் காய்க்கக் கூடிய ஒரு கொடி இது. கோவைக்காய் நீரிழிவு நோய் உள்ளவர்களுக்கு ஏற்ற காய். அதனால் நீரிழிவு நோய் உள்ளவர்கள் அடிக்கடி கோவைக்காய் சட்னி,கோவைக்காய் பொரியல், கோவைக்காய் அவியல், கோவைக்காய் பிரட்டல் என்று வகை வகையாக செய்து சாப்பிடலாம்.
தேவையான பொருட்கள்
கோவைக்காய் - 20 எண்ணம்
உளுந்து - 2 டேபிள்ஸ்பூன்
இஞ்சி - சிறிய துண்டு
மிளகாய்வத்தல் - 2 முதல் 4 வரை (காரத்திற்கு ஏற்றவாறு)
பெருங்காயப்பொடி - ஒரு சிட்டிகை
தக்காளி -1
நல்லெண்ணெய் - 1 டேபிள்ஸ்பூன்
உப்பு - தேவையான அளவு
செய்முறை
கோவைக்காயை கழுவி சிறு சிறு துண்டுகளாக வெட்டி எடுத்துக்கொள்ளவும். ஒரு கடாயை சூடாக்கி அதில் நல்லெண்ணெய் சேர்க்கவும். அதில் உளுந்து சேர்த்து வதக்கவும். உளுந்து சிவக்கும் வரை வதக்கவும். உளுந்து சிவந்தபின் அதில் மிளகாய் வத்தல் சேர்க்கவும்.
பின் அதனுடன் கோவைக்காயை சேர்த்து அரைவேக்காடு வேகும் வரை வதக்கவும். அதாவது கோவைக்காயின் பச்சை நிறம் மாறும் வரை வதக்கவும். வதங்கியபின் அதில் இஞ்சி மற்றும் தக்காளி சேர்த்து வதக்கவும்.
பின்பு பெருங்காயத்தூள் சேர்த்து சில நொடிகள் வதக்கவும். பின்பு அடுப்பை அணைத்துவிட்டு ஒரு தட்டிற்கு மாற்றி ஆறவிடவும்.
ஆறியபின் மிக்ஸி ஜாரில் சேர்த்து தேவையான அளவு உப்பு சேர்த்து அரைத்து எடுத்தால் சுவையான கோவைக்காய் சட்னி தயார். பரிமாறும் போது கடுகு தாளித்துக் கொள்ளலாம். கடுகு தாளிக்காமலேயே சட்னி நன்றாக இருக்கும்.
